Ghjacumu Thiers

Citar este documento : Mattei, Julian, Ghjacumu Thiers, Médiathèque Culturelle de la Corse et des Corses, consultado el 22 novembre 2024, https://m3c.universita.corsica/s/es/item/2187

¿Informar de un error?

Título : Ghjacumu Thiers

Descripción : Bastiacciu di ceppu è di core, Ghjacumu Thiers hè un puntellu maiò di u Riacquistu di l’anni settanta. Agregatu di l’Università, fece u prufessore di lettere classiche in Nizza, Aiacciu è Bastia nanzu di raghjunghje l’università di Corsica in lu 1983 induv’ellu si busca una catedra di lingua è cultura regiunale cù u gradu di prufessore di l’Università. Hè ancu statu u presidente di a ghjuria di i cuncorsi di u CAPES di corsu da u 1995 à u 1998. Duttore in linguistica, hè dinù l’autore di parechji travagli scentifichi in u duminiu di a sociolinguistica cum’è Papiers d’identités ch’ellu publicheghja ind’è Albiana in lu 1989 è chì hè ricacciatu da a so tesa di dutturatu. Da u 1994 hè statu u direttore di u Centru Culturale Universitariu chì s’incaricheghja di l’animazione culturale nantu à u campus è di e rilazione di l’Università di Corsica cù i stabilimenti d’insignamentu superiore di u cuntinente è di u Mediterraniu. Tandu trova omu in u so percorsu un impegnu impurtante assai per a prumuzione di a lingua corsa è a messa in ballu di una pulitica culturale. Hè d’altronde u presidente di l’associu di sustegnu di u centru culturale universitariu chì caccia ogni simestru a rivista literaria Bonanova. Fattu si stà chì Ghjacumu Thiers ci sparghje u so talentu di scrivanu di spressione corsa, scrisse in modu regulare ind’è l’anni settanta in a rivista Rigiru, diretta da Dumanicantone Geronimi è publicò ancu e so cronache è studii ind’è Kyrn. Face propiu parte di quelli ch’omu chjama di solitu « A leva di u settanta » è chì dete à a Corsica parechji metudi d’amparera di u corsu cum’è Stà à sente o Pè (cù G. Chiorboli) è Dì tù, un metutu audiù urale (cù G. Chiorboli è G.T Rocchi). In lu 2013 caccia un metudu numericu d’amparera di u corsu, Imparà u corsu, cù l’associu di sustegnu di u Centru culturale universitariu. Cunnisciutu dinù per a so puesia, Ghjacumu Thiers hà cacciatu parechje racolte cum’è L’arretta bianca, in lu 2006 o In e dite, in lu 2007. Firmò ancu canzone chì sò oghje successi tremendi di E duie Patrizie, Canta u Populu Corsu, I Muvrini, Tavagna o puru I Surghjenti. Dramaturgu produttivu assai, diresse a truppa di a Scola Corsa è di a Scola Aperta, è scrisse parechje pezze cum’è L’Orcu, U Rè, A scusa di Pasquale Paoli, Pandora, U Casale, I Strapazzi di Bazzicone o puru Tutti in Ponte novu, ghjuvendu si assai di a scrittura cum’è arnese pedagogicu in u quatru di i so corsi di lingua corsa. Ghjacumu Thiers a si pruvò, cù cullaburazione diverse à creà e rilazione cù l’attori culturali d’altrò cum’è Marco Cini à l’università di Pisa. Scrivanu di talentu è rumanzeru si busca u premiu di u libru corsu in lu 1990 cù u so primu rumanzu A funtana d’Altea chì fù ancu publicatu in francese, talianu è in rumenu. In lu 1996 caccia u so sicondu rumanzu A barca di a Madonna chì sera ancu traduttu in francese sottu à u titulu di La vierge à la barque. In lu 2003 publicheghja u so terza rumanzu in lingua corsa, In Corpu à Bastia induv’ellu sparghje a so passione per a so cità nativa è ch’omu ritrova longu à a so opera. In lu 2013 u so ultimu rumanzu, I Misgi, riceve u premiu di u libru corsu di a Cullettività territurale di Corsica. Da poi u 2012, Ghjacumu Thiers hè u presidente di l’Accademia di i vagabondi di u cunsigliu di a lingua corsa è hè incaricatu di una missione di creazione culturale per l’Università di Corsica. Riferenze bibliugrafiche : Papiers d’identités, Ajaccio, Albiana, 1989. A funtana d’Altea, Aiacciu, Albiana, 1990. A barca di a Madonna, Aiacciu, Albiana, 1996. In corpu à Bastia, Aiacciu, Albiana, 2003. Septième ciel, Aiacciu, Albiana, 2007. I Misgi, Aiacciu, Albiana, 2013. L’arretta bianca, Aiacciu, Albiana, cull. E Cunchiglie, 2006. In e dite, Aiacciu, Albiana, cull. E Cunchiglie, 2007.

Disciplina : Littératures

Tipo : Textes imprimés

Colección : Puntelli per l'Antulugia Nova di a Literatura Corsa (ANLC)

Autoría : Mattei, Julian

Fecha : 1945

Idioma : Corse

Licencia : Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International, à la condition expresse de citer l’institution de conservation et l'identifiant de la ressource comme suit : « Médiathèque Culturelle de la Corse, [identifiant de la ressource] ».

Puntelli per l'Antulugia Nova di a Literatura Corsa (ANLC)

Cette collection rassemble des fonds d’archives consacrés à la production littéraire corse d’hier et d’aujourd’hui. Par littérature corse, il faut entendre un corpus protéiforme...
Ghjuliu Bernardini
Ghjuvan Ghjaseppu Franchi
Ambrogio Rossi

Ver todos los documentos

Añadir un comentario

Comentarios

Todavía no hay comentarios ¡Sé el primero en añadir uno!